Ulika- Neda Milenkovski

Autorska poezija


ULIKA

 

Va samine vrta, va tihen mojen kantuniće

z blogoslovon mojega noneta je tu

ona, na dne vrta poli suhozida

svedok bijotega vremena detinjstva,

gledan je, leta nose je nakrcala

z gronami miluje drago mi teplo ugnjišće.

 

Prvi koraki son padala, pokle prveh se digivala

va hlode njejnega fruta prvi amor zakantala

prvi kupi nemira lecila dok je ona cvola,

 

draguljica moja, nje son prvi šekreti konsenjala

s manon je udahnula tvoj prvi bačin,

nje son se kako matere spovedala

dok son se za prvi grehi kajala.

 

Još va macoline sprovljena je

rožica zakona z njegovega veštida

moji koraki so teški i već trudni

a srce infašano va blagoslov nonetov.

 

***

Farmoj se živote, kamo prešoš živote

ca ne vidiš da na onen putiće, tamo

zome još nešto se more noć,

 

ti, draguljica moja, ulika poli zidića

do tvojeh korenah moji so koreni još živi

dok ti si pod ziden, bit će i mene žive,

draguljica moja, ulika mojega noneta.


Tagovi:

Podijeli ovu stranicu

VRH