Trputec

Aleksandar Horvat

Trputec

“...Zajček, gumbek, bažulek i slak, / čuli su trpuca, kak punta se bedak…” - M. Krleža 

Špinčite se samo, scifrani trucljivci,
Ne bu niti vaša za navek gorela,
Dosta su trpuci za se bili krivci,
Saka se nevola v trpuca zadela.

Špinčite se samo, v opravi z štacuna,
Vama slične fele v gartlicu su sigdi,
Za jezero takvih dost je jedna kuna,
A trpuca nemaš za kupiti nigdi.

Na trpucu ftrči očete korbača,
Pokriti mu sonce, seme mu zatrti,
Scartani i slepi vi plujete drača,
Ne vidite da ste v gartlicu zaprti.

Mi smo pravi nasad, i nas zemla štima,
Kesite se v reštu od scifrane zloče,
Vaš bu gartlic zvehnul, zela vas bu zima,
Sloboden trputec raste gde god oče.

(A. Horvat, 2018)

Tagovi:
VRH